我係中短髮大家知道的，而呢類長度要打理起上嚟，其實係比長髮更麻煩!
遇着 bad hair day 又唔可以好似長髮咁紮起佢，洗完頭又扁扁塌塌，好多時都要靠造型產品幫手先出到街，所以 "dry shampoo / 造型鹽水噴霧" 不經不覺已經變成我每日不可缺少嘅日用品。
"造型鹽水噴霧" 好係好，但用完要吹頭嗰吓麻煩，遇着趕時間的話，我通常都會用 "dry shampoo" 取替。而我用 dry shampoo 唔係因為頭髮偏油，相反我經常漂染頭髮係好乾的，只係貪佢一噴上去就得夠方便，雖然冇定形 / 造型效果，但至少噴完會蓬鬆一啲，冇咁扁塌。
Dry shampoo 我一向用開「Batiste」，已經用到好悶喇，於是上星期經過公司附近的頭髮用品店，就打算買支「MOROCCANOIL」dry shampoo 試試~
點知咁啱見到佢有呢套「Refresh & Go 清爽造型旅行套裝」喎! →
一套有齊定型噴霧 + dry shampoo + 髮泥噴霧 + 髮尾油，直頭 fit 晒要求啦~ 😍
「MOROCCANOIL」支髮尾油又幾出名唔使我多介紹了吧~
除咗有用緊佢嘅髮尾油之外，我亦曾經用過佢支「Extra Volume Shampoo (豐盈潤澤洗髮乳)」，不過就覺得呢支洗頭水乾到爆炸，又貴又冇效果，可以不試。
至於今次推介呢個 travel size 造型套裝，我就認為好好用! 而且細細支亦好適合未用過又想試吓的人，試過啱用就可以買大 size~
我係响尖沙咀金馬倫道地鐵站口對面嗰間髮品店買的，售價 $399 set
如果唔知邊度有得買 / 更方便自己可以買到，亦可以去 MOROCCANOIL 香港官網查詢:
made in U.S.A
非天然成份或有機產品
好老實講，我只係為咗呢 3 支造型噴霧而買的 →
原本只係想買一支細 size dry shampoo 試試，但 1 支都百幾蚊，3 支係四百幾，計落買 travel set $399 仲着數，平咗兼多咗支髮尾油，又可以試勻 3 款唔同嘅噴霧效果~
摩洛哥順髮油輕柔版 Light (25 ml) →
蘊含豐富的堅果油和修復蛋白質，能即時修護順滑秀髮，而 Light 配方係專爲纖幼髮質及淺色頭髮而設。
呢支我用開 original 滋潤版，Light 輕柔版絕對唔夠我咁乾旱嘅髮質用，不過照殺~~ 😂
至少旅行時可以用~
Luminous Hairspray Strong Finish 閃亮強效定型噴霧 (75 ml) →
質感輕盈、可變造型而不起白絲、效力持久，並能為髮絲增添閃亮光澤。用後頭髮仍能輕易疏理而不留黏性殘餘物，同時可撫平毛躁並抵抗潮濕天氣。適用於強效定型。
以我用過咁多 hair spray 嚟講，呢支並唔算太 strong hold，只能話係中高，但日常用已經好足夠，唔會太硬唔自然，效果亦持久，可以 hold 到全日，就算再梳頭亦唔會起白絲~
加上氣味討好 (同佢支髮尾油一樣味)，唔會有好大陣化學膠味，香氣可以持續一整天，就好似洗完頭咁清新，值得推介~
雖然個名有 "閃亮" 兩隻字，但其實係一啲都閃的，唔會噴完成頭光晒，可以放心。
Dry Texture Spray 清爽質感噴霧 (60 ml) →
蘊含堅果油成份的質感噴霧，能輕易造出自然不刻意的持久造型，有助塑造出豐盈隨性的質感效果，亦可於編髮及髮髻造型前使用，有助打造出有力及具質感的基礎。
髮泥大家知係咩啦，而呢支就係 "噴霧版髮泥"，會輕盈過普通髮泥好多倍，唔會有黏黏立立 / 硬身感覺，特別適合女仔用，噴完可增加 volume，頭髮亦會變得更有力，易於造型~
不過就唔好對佢期望太大，佢只係可以增加少少 volume，唔會變得勁厚勁硬勁有力嗰隻，所以係只適合普通日常用。
本來呢種髮泥噴霧我係打算買另一個牌子「KMS」的，因為髮型師借我用過都覺得 ok，但用過呢支「MOROCCANOIL」後就返唔到轉頭了! 因為 MOROCCANOIL 香好多呀，唔會成頭膠味~ 😌
Dry Shampoo 免沖洗淨髮噴霧 (Light Tone 淺色髪色) 65 ml →
含有極致纖細的大米澱粉，兼具防紫外線功能，可吸收油脂、污垢和氣味，讓秀髮回復清爽乾淨及豐盈。而添加的摩洛哥堅果油配方中含有微細的紫色色調，能幫助平衡漸漸變為黃橘色的淺色髮色，並呈現出最佳的淺色髮色。
雖然係貴過「Batiste」好多，MOROCCANOIL 呢支 full size 要二百左右! (Batiste 只係幾十蚊) 但香味就自然過 Batiste 好多。而最重要嘅係，Batiste 噴完頭髮會變白，要自己不停撥撥撥，有時撥完都仲係會白，而 MOROCCANOIL 呢支噴完係一啲都唔會變白~ 👍🏻
呢支有分 dark tone / light tone，套装包嘅係 light tone，好 fit 我髮色，噴完同自己髮色一樣，睇唔出有噴過般自然。深髮色可揀 dark tone，我見到髮品店內亦有售 full size 及 travel size。
至於效果，我認為係同佢上圖嗰支「Dry Texture Spray 清爽質感噴霧」分別不大，都係清清爽爽添加返少少 volume 咁，直頭 feel 唔到有分別，不過油性髮質就揀呢支會更好~
沒有留言:
張貼留言