2017年2月9日 星期四

整完唔夠一星期就甩晒、極唔專業、唔會再幫襯嘅植眼睫毛店

話說近月愛上 "植眼睫毛",都 keep 住連續整咗幾個月喇,而幫襯開嘅就係之前已經介紹過嘅「Carte Blanche」(日本人主理嘅植眼睫毛 + gel 甲店)。

介紹重溫 : http://isadoracheng.blogspot.hk/2016/12/gel-carte-blanche.html

雖然「Carte Blanche」係整得好好、我又好滿意、地方又靚,但就嫌佢貴咗 d (我搵開日本人整約 $1200),所以我過年前就上網搵咗第二間試試喇~

平時去開好好嘅「Carte Blanche」,張床勁靚→




上 FB search 完、結果 book 咗間响公司附近 Solo Building 嘅「Pretty Nail & eyelash Shop」,植眼睫毛約 $400 幾:https://www.facebook.com/819prettyshop/?fref=ts


首先去到嘅第一感覺:

舖頭唔大我係 ok 的,但床舖望上去就唔多夠衛生...... 以我呢種有潔癖嘅人嚟講,其實已經唔係好想瞓上去,不過既然已經去到,就整完先算啦,可能會整得好靚呢?

然後,一瞓低姐姐就嗱嗱聲自動波開始植眼睫毛,完全冇問過我有冇眼部敏感 history? 想要咩款咩效果? 亦冇比過假睫毛款式我選擇。於是整咗一陣我就忍唔住問佢喇,原來.... 佢係唔記得咗問......(ummm.....)


時間方面,大約 1.5 小時整完 vs. 平時去「Carte Blanche」係只需 45 分鐘。

整咁耐係因為唔熟手? 定係因為佢比較仔細? 

我真係唔知,但係望上去就唔係植得特別多條數..... 囉。


效果 x 持久度

望上去屬 natural 款,假睫毛係好輕身,但就唔夠捲曲上揚,d 假睫毛比較似向前多過向上翹,效果一般。咁都係諗住試一試,唔啱咪下次試過第二間囉,效果差 dd 都唔緊要啦,過完年先再算。點知......

都未捱到過年、一星期 d 假睫毛就已經甩晒!真係好想知道佢用咩膠水可以甩得咁快?! 

所以呢間「Pretty Nail & eyelash Shop」一定要 blacklist,完全係嘥錢嘥時間!結果我又要死死地氣返去「Carte Blanche」俾錢整過......


再睇返於「Carte Blanche」過年前植嘅假睫毛,每眼植咗 70 條盛惠 $1200,係好貴、但 so far 過咗 3 星期仲有 6-7 成假睫毛健在,又真係貴得有道理嘅 →

雖然都想再出去試吓其他,不過經歷完上一次後,都真係好有陰影.....


沒有留言:

張貼留言