2018年3月3日 星期六

中女版之「遊日本必買藥妝店 好物推介 review」2018

Engagementmoon 完畢,終於响日本返嚟喇 🤗

買咗一大堆化妝品 + 面膜 + skincare + color con + 藥品,又係時候 share 俾大家知有咩值得買,又有啲咩係雷品喇~

雖然日本係有好多正嘢買,不過好多熱銷品其實 HK 都一定有得賣,部份產品價錢同 HK 亦唔相差得遠,冇買亦唔會覺得可惜,加上中女膚質同喜好始終都同後生女唔同嘛,所以我都係只揀自己啱用嘅先買,去前仲已經做好 research,中女當然係買返中女啱用嘅嘢啦~

一次過分享 40 件產品 review,寫足我 3 日,真係有血有淚 😆

而今次日本之旅我都有去 department store 買專櫃化妝品,留待下篇文再 share,今篇介紹咗藥妝店商品先~

(下圖係藥妝店部份戰利品)



驚安の殿堂 →

今篇全部商品都係响呢間驚安店買的~

個人認為會比藥妝店更大間、更多嘢睇、貨品種類亦更齊,除咗化妝品 / skincare / body skincare / 藥品之外,連零食 / 家品 / 電玩商品 / 玩具精品 / 名牌手袋手錶首飾 / 連成人玩具都有! 

一楝 5 層高,層層都咁多嘢睇足以行到氣喘,仲要 24 小時無休! 一入去分分鐘出唔返嚟 😜


不過內裡每條巷極窄,商品擺到密密麻麻咁,係有啲顛 →

勝在夠多嘢睇,一間可以揾齊晒,唔使周圍逛幾間咁煩,反正價錢亦相差無幾。

強烈建議唔怕夜的話就過咗 11pm 先好去,清清靜靜冇人又唔使排隊,超爽! 試過下午同晚飯後去逛,層層都迫爆人撞人,連睇都冇 mood 好想即刻走 😣


每件商品我備註埋 HKD 俾大家參考吓,不過我今次去係 ¥100 = HKD 7.1,並非遊日好時機,所以換成港幣係幾多要視乎你幾時去了。


Lip color 唇妝


Kose「Lip Gel Magic Top Coat」唇部防脫色透明雨衣 (¥1500 / 約 HKD 110)

聞說搽完唇膏後再搽佢,可令唇膏變為持久不脫色,而唔會影響本身唇膏顏色,係暢銷商品熱捧貨! 有分珠光版 pearl / 啞緻版 matte,2 款都係透明冇色的 


我買咗珠光版 pearl →


所謂珠光版,其實亦只係得幾粒幼細銀粉仔,唔算好閃,可放心 → 


搽完自己唇膏後再搽佢 →

搽上後會形成一層超薄唇膜,效果屬於微光,好薄身自然,一啲都唔 glossy 唔黏稠,有少少保濕度咁,不過保濕感覺就未稱得上持久。

至於有冇令唇膏變得不脫色?

搽完佢再飲水食嘢,水杯的確係冇沾到唇色,抹嘴時紙巾上亦冇唇色甩出。不過過多 2-3 小時後就明顯見到個嘴甩晒色...... 而且佢明明話搽咗唔會影響本身唇膏顏色,但我一搽上去已經見到佢有令自己嘅唇膏變淺色咗少少...... 

所以認為只係一般,倒不如直接買支不脫色唇膏仲實際 👎🏻


FLOWFUSHI「38°C Lip Treatment」唇采 (¥1600 / 約 HKD 117) →

又係熱捧商品,曾經賣到斷貨!

賣點係成份具 300 億個乳酸菌,有矯正唇色同滋潤效果,識得隨著唇部温度變色,仲話連續用 1 星期能改善原本唇色! 冇香料 / 色素,具 SPF20 防曬度。 


共 4 色選擇 →


至於買邊隻色好呢? 🤔

根據 FLOWFUSHI 指出,理想唇温係 38°C,呢個温度嘅唇色係最靚,而呢支 lip treatment 就可以自動幫你調校至 38°C 理想唇色,可從下圖本身的唇色中去揀。

(圖片 from 日本官網) 


唔同嘅唇色搽完後就會變成咁 →


我買咗 +3°C 呢款 #Coral Pink →

要讚讚個 S 形掃頭設計,特別能緊貼唇部弧度,搽上唇時份量亦剛好 👍🏻


上唇效果 →

隻淡粉色係好靚! 一搽就愛上! 😍 

而且感覺水嫩潤澤、晶瑩剔透、仲平復到唇紋,呢支值得買呀!


至於連續搽 7 日係咪真係會改善到唇色?

由於心急趕住出 blog,暫時我只係用咗 2 日未見到效果,遲啲再話俾大家知~


KOSE 副線 Visée「Crystal Duo Lipstick Sheer」水晶透潤唇膏 (¥1500 / 約 HKD 110) →

呢款 HK KOSE 專櫃都有售,只係未有呢 6 隻 2018 春季新色~

賣點係雙層設計,以透亮滋潤的 "clear 外層" 包住 "color 內層",一搽就自然暈染輕易造出咬唇妝,屬自然紅潤透唇效果。


6 款 2018 spring color 新色 (圖片 from 日本官網) →


我買咗 #PK865 →


上唇效果 →

由於外圈係透明滋潤層,而唇膏只係得一小圈,所以效果會比較 sheer,唔會太實色飽和,就好似一支有色嘅潤唇膏咁,不過就剔透啲 / 潤啲咁解。

雖然感覺夠滋潤亮澤,但就冇預期之中咁水嫩,都算 ok 的,我自己就覺得唔係太有驚喜,但喜愛淡妝的人也不妨一試,日常返工用都唔錯~


Eyeliner & Mascara

MSHLove Liner眼線液 (¥1600 / 約 HKD 117) →

呢支應該唔使多介紹,愛用 liquid eyeliner 的一定有買過~ 😁

HK sasa 都有售 ($118),响日本買純粹係因為順手,其次係因為上次試過响 sasa 買過支 Love Liner 出唔到色,所以都係日本買更好。

共 5 色選擇


揀咗特別啲嘅 Burgundy Brown (酒紅色),襯返我髮色 →


毛筆掃頭設計,墨汁穩定性高,出色唔會時深時淺唔均勻 →


雖然人人都愛用 Love Liner,但其實我覺得佢個掃頭畫出的眼線並唔算特別幼,熟手用當然能掌握粗幼力度,但新手用都係有機會會出事。

反正我本身都愛畫粗身眼線,所以對我嚟講係冇所謂~


試用圖 →

屬 sheer 亮漆效果,唔算太實色,畫上眼會比試上手時深色少少,顏色都幾靚~

而持久度方面係全日不脫色,冇溶化過 👍🏻


嫌酒紅色太 sharp?

當然你也可以揀啡 / 黑等大路色

但其實只要於酒紅色 eyeliner 下面畫多條黑色眼線液,眼妝就變得冇咁誇張了~ 呢個 "雙色眼線妝" 連 eyeshadow 都慳返,畫 2 條唔同色嘅眼線就出得街 😍


MOTE Liner 眼線液 + MOTE Mascara 睫毛液 (¥1800 / 約 HKD 132) →

MOTE 其實都係 FLOWFUSHI 出的,即與上面介紹嗰支「38°C Lip Treatment 唇采」同牌子,而 MOTE 的 mascara 同 eyeliner 都係得獎熱賣品,mascara 仲多到有 9 款,真係要乜有乜! 😂


 連眼線液都有 5 色選擇 (圖片 from 日本官網)


最後買咗 →

左 : 橙紅色 "DRAMATIC 睫毛液" 號稱史上最強纖長 + 濃密,連短睫毛都掃到

右 : 眼線液 #BrownBlack 啡黑色


MOTE Liner 一向勁多人推薦 →

賣點係筆管採用符合人體工學的獨特八角型設計,畫時不易跣手,墨汁穩定性亦高,顏色飽和夠實色,而且有添加抗色素沈澱成份,能避免因長時間化妝而引起色素沈澱。

防水防溶呢點當然係 must 啦~


同 Love Liner 一樣屬毛筆掃頭設計,但呢支 MOTE Liner 筆尖就更幼小,顏色更飽和更實色,可輕易畫出幼身眼線,新手用同樣容易 handle~


試用圖 →

試上手明明係啡黑色,但畫上眼時卻比較似黑色多啲,所以唔使買 #Black 都得,呢支 #Brown Black 已經好夠黑了。

特別要讚佢個八角型筆管設計真係好得! 畫時隻手真係會揸得定好多,唔跣手,筆尖亦流暢易畫,持久度一流,全日冇溶化過,呢支值得入手 😍

(個人眼細喜愛畫粗身 eyeliner,其實佢筆尖係好幼的,畫幼下圖一半都零難度)


至於支 MOTE Mascara #DRAMATIC →

呢支掃完睫毛即刻 drop,睫毛本身夾到好彎都立刻變唔彎,完全 hold 唔到弧度,可以不買 👎🏻 


Shiseido 平價開架副線「INTEGRATE 精萃睫毛液」(¥1200 / 約 HKD 88) →

日本剛推出咗一陣,一推出已經榮登榜首!

雖然 hk 部份 Watson's 亦有 INTEGRATE 開架專櫃,不過就未有呢款新出嘅 mascara


我本身睫毛係夠長的,只係隨著年紀變得愈來愈稀疏,所以就揀了 #VOLUME 濃密版 →


台灣官網介紹 →


用後感 →

又係同 MOTE mascara 一樣太濕太重,掃完睫毛即刻 drop,可以不買 👎🏻 


Eyeshadow 眼影


日本開架品牌如 LB / Visée / Excel / Canmake / INTEGRATE / Majolica / KATE / media 等等的眼影組合,又平又多色揀,每盒只係 HKD 70-90 左右,的確係會令人花多眼亂!

至於點揀好? 

計我話唔使揀啦,全部 hk 都有得賣嘛! 唔貴得過日本好多 😂


不過逛驚安店勝在牌子夠齊全,可以一次過試勻晒去比較,唔似得响 hk 要走幾間 Watson's / LOG-ON / sasa 先試得齊咁多個 brand。

咁方便,唔試勻晒啲色就蝕底了! 😙


如果你問我邊隻最好,其實呢幾個開架 brand 眼影粉質都相差無幾,所以揀自己鐘意嘅顏色就可以了。

如同專櫃中高價牌子比較,始終一分錢一分貨,總括計貴少少嘅 eyeshadow 粉質係會壓縮得實淨啲、冇咁鬆散、冇咁易飛粉跌粉、上色更飽和、更貼得實眼皮、眼妝亦會更持久,所以我一般只用專櫃眼影粉。

但如果你好少化妝唔想買咁貴,咁開架 brand $100 有找又確係抵玩嘅~ 


話唔買唔買,最終都係買咗盒 Visée #BR-5 Golden Brown 😆 

約 HKD 88 only,平過 hk 買 10 蚊,超抵玩! 

心諗以後帶佢去旅行用,萬一跌碎咗都唔心痛嘛~


雖然呢盒唔係 Visée 最新色,不過是但啦,反正新色我睇唔啱


試色圖 →

今日返工試咗,首先支化妝掃實在太短太 mini 好難揸得實,好易掃得唔均勻,然後掃上眼時確係會跌粉,3 小時後仲溶埋妝落眼底變熊貓......

又再一次體驗到都係貴少少嘅專櫃 brand 比較信得過 😢


Color Con 大眼仔 / 美瞳


無論你有冇戴 color con 習慣,去到日本點都要買返盒傍身 😌

驚安店牌子多、款式多、新品多、又平過 hk 買喎,當然要把握良機! 即棄型日 con 每盒 5 對,平均 2 年先過期,買定去飲宴 / party 用都抵啦! (也有月 con 出售)


温馨提示 →

日本買 con 要填表,除咗要填自己左右眼度數外,亦規定要填睇開嘅眼科診所名,冇的話也請隨意寫一個 (其實佢唔會 check),否則係唔會賣俾你的。


買咗倖田來末代言嘅「loveil」1 Day 大眼仔 (每盒 10 枚 = 5 對¥1600 / 約 HKD 117) →

呢款係 DIA 14.2mm 直徑的,日常用的話效果會比較誇張,適合宴會 / party 用


Loveil 即棄日 con 6 種款式 →

我揀咗左二 #Brown mirage


枱燈照射下睇,效果會比較誇張 →


不過日光之下睇,其實又唔係咁誇 →

我雙眼一向乾到爆炸零眼水,响 hk 買過好多日本 / 台灣 / 香港牌子 color con 都忍唔住要經常滴眼藥水,反而去到日本天氣咁凍咁乾,戴住呢對 Loveil 全日都冇需要滴眼藥水,唔會乾爭爭又輕身,鏡片夠薄亦夠軟,好舒適! 👍🏻

但如愛自然款也可揀 #Coutune Brown,或其他 DIA 14 (直徑) 以下的牌子


EverColor 1 Day 大眼仔 (每盒 10 枚 = 5 對¥1600 / 約 HKD 117) →

DIA 14.5 超大直徑! 色號 #Rich Night

從來冇用過咁大對 color con,但正所謂人一世物一世,試吓 DIA 14.5 有幾勁都好! 🤣


效果冇想像之中咁誇張,不過都係好大對囉 haha 😆

要留待拍 video / 影相 / 宴會先用得著了。同 loveil 一樣咁舒服、唔乾唔刺眼、好薄好輕身~


Color List 1 Day 大眼仔 (每盒 10 枚 = 5 對¥1000 / 約 HKD 88) →

最平係呢款! 就係見佢咁平所以先試 😝

DIA 14.2 直徑,同上面對 Loveil 一樣咁大


共 4 色選擇 →

最初買咗 #BR03,第 2 日又返去買多盒 #BR04,因為實在太抵玩喇! 


#BR03 效果 →

3 款之中最自然係呢款 😍

雖然同 Loveil 同為 DIA 14.2 直徑,但因為款式冇咁誇,所以望上去順眼自然好多~


用後感 →

雖然佢鏡片又係好輕身、好軟好薄 (最軟薄係佢),舒服到幾乎唔記得自己戴咗 con 咁,價錢平效果又靚,不過都有缺點!

就係佢本身浸住對 con 嘅藥水我覺得勁刺眼,戴完不停流眼水,要成 5 mins 先平復到...... 第 2 日我改用自己嘅眼藥水洗過佢先再戴,就完全冇問題勁舒適了,於是又返轉頭買多 2 盒~ 


仲有男仕專用嘅 color con →

不過我冇買呀,純粹影俾大家望吓 (其實咪又係 color con 一對,不過款式自然啲之嘛) 


Brows 眉筆


Shiseido 副線 INTEGRATE Gracy 眉筆 (¥400 / 約 HKD 29)

以前去親日本必買嘅平價 Shiseido nevue 短身六角眉筆,經已於各大藥妝店絕跡,呢支係 Shiseido 另一平價副線 INTEGRATE Gracy 眉筆,已取替 nevue 六角眉筆寶座,勝在價錢平大大支。


筆芯冇 nevue 六角眉筆咁硬,比較易出色,屬中等硬度,畫得流暢但色效較鬆散,出汗多的話都係會 smudge 開溶妝,同埋覺得佢畫出時零線條感,所以除非貪平想求其揾支眉筆畫吓,否則不建議購買。


Visée「Soft & Slim Eyebrow Pencil」極幼雙頭眉筆  (¥800 / 約 HKD 58)

賣點係 1.7mm 極纖細筆芯,連微細部份都能精細勾畫出線條感,質感柔滑出色,配合角鯊烷美容液成份,並附設螺旋刷方便梳理眉毛,無香料。 

平過 HK 買 10 蚊,共 6 色選擇


買咗 #BR303 最淺啡 →


首先要讚佢個螺旋刷! 比我用過的貴價眉筆附設的螺旋刷都更幼細,唔會一刷就刷散晒眉色,好抵讚! 😘

另外係佢個 1.7mm 筆芯真係好 good,輕易就勾畫到幼細嘅仿真眉毛,同我以前推介過嘅 Shiseido「Eyebrow Styling Duo 眉筆」一樣咁幼 ($280),但價錢就平幾倍,又多顏色揀,而且冇 Shiseido 嗰支幼得來咁易斷! 正呀~

雖然唔係 waterproof,但勝在顏色夠飽和,都 keep 到一日的 (除非好大汗 / 好出油)


Every Anna Donna 染眉膏  (¥1200 / 約 HKD 88)

Brow mascara 响 HK 有 KATE / Fasio / Maybelline / Etude House 等等平牌 (sasa 大把),就連貴牌如 Bobbi Brown / Shu Uemura / M.A.C 等等都有出,但通常只有深中淺啡,唔會有粉紅色 / 靚嘅啡紅色,反而呢隻 Every Anna Donna 有呀! 染咗粉紅色頭的人有福了~ 

呢個牌子最出名係頭髮 color treatment,所以就出埋 brow mascara 襯返唔同嘅髮色。


Cushion Foundation


FLOWFUSHI「ION de Cushion」氣墊粉底 (粉芯不連盒 ¥2200 / 約 HKD 162) →

去過日本的一定有試過呢隻被喻為日本第一、曾經賣到斷市嘅氣墊粉底! 雖然並非新品,不過好用嘅嘢從來冇分新唔新,啱用就得啦~

Cushion 粉底呢樣嘢,無論你買外國牌子 / 日本牌子,其實好多都係韓國製,而呢隻 FLOWFUSHI 就打正旗號係 made in Japan,除咗採用天然礦物獨家配方,質感水潤之外,仲可阻擋 PM2.5 霾塵同花粉,都咪話唔爽~

有分 natural 水潤自然款 (金盒) / cover 遮瑕款 (紅盒),每款深淺 2 色選擇。

詳細用後感 :


化妝小物 


ESPRIQUE 粉樸 (¥400-600 / 約 HKD 29-44) →

以專櫃牌子計咁嘅價錢係平到震! 不妨買返 2-3 個替換,好用過 sasa 買嗰啲好多!


雙眼皮膠紙 (¥725 / 約 HKD 53) →

呢款日本膚色雙眼皮膠紙我每日用開,雖然冇台灣的網紋貼咁隱形,但勝在使用方便,一貼就得,適合日常趕時間用,唔似得網紋貼要搽膠水咁麻煩~

HK sasa 都有售 $29 / 30 對,而日本買呢包係增量版 $53 / 90 對,相等於買 2 送 1,當然要大量入貨! 😁


貼上眼效果 →

我係好重身的內雙眼皮,唔用膠紙會直頭似單眼皮,每日唔貼膠紙係唔出街嘅 😂

而雙眼皮膠紙我經已試過 N 款,貼力最強同隱形嘅都算係呢款了,不過仔細睇都仍會見到條膠紙,係無可避免喇,始終真係有貼嘛~


Shu Uemura 皇牌睫毛夾 (¥1180 / 約 HKD 87) →

响驚安店買會比响 HK 專櫃買平一半! 用開架價錢就買到專櫃貨~

呢款以前已經介紹過,係可以考慮的,不過個人只獨愛 Laura Mercier 睫毛夾,認為更貼合我眼型,所以買唔買就隨你自己喜好了。


Skincare


毛穴撫子「小蘇打去角質黑頭洗面膏」(¥1000 / 約 HKD 73) →

呢支長期穩佔日本 cosme 大賞銷售榜首位嘅洗面膏,hk 嘅 LOG-ON / HKTVmall 等等都有售 (約 $128),但日本買會更抵~

賣點係價錢平,可以溫和清除到舊角質、溶解毛孔內深層污垢、仲係針對粉刺黑頭 / 士多啤梨鼻而設,洗完塊面唔繃緊,仲可以緊實毛孔、明亮膚色、嫩滑肌膚等等。而且係冇香料,敏感肌都可以用。

我自己就覺得冇講到咁神奇,係洗完唔覺得乾同繃緊囉,但收細毛孔 / 明亮膚色就唔多覺,都係普通一支會起泡嘅洗面膏咁,勝在夠平,至少好用過 AquaLabel / Shiseido 嗰啲洗面膏先,都係好值得買嘅~


Mask 面膜


盛田屋 玉の輿「豆腐面膜 paper mask」(一盒 5 片¥640 / 約 HKD 47) →

盛田屋呢款 "食用級" paper mask 人氣度超高,又係 hit 到 HK 萬寧都有售,但日本買會平廿蚊盒。

賣點係採用 1.5 倍豆乳、乳酪、蜂蜜、蜂王漿等天然親膚食物級成份製,仲有綠茶、蘆薈、巴西莓、黑豆、番茄、石榴籽、蘋果等成份,而且不含香料 / 色素 / 礦物油,所以被喻為 "食用級 paper mask",連敏感皮膚同孕婦都用得~

有分抗老 (紅盒) / 補濕 (粉紅盒) / 美白 (藍盒) 


中女當然係揀返抗老版「豆腐抗老保濕面膜」→

每片面膜含有 23ml 精華液


面膜紙採用 100% 日本棉,摸上手確係特別軟身柔温,仲有滿滿嘅精華 feel 到好滋潤 →


用後感 →

雖然紙質算貼面,但 size 都好大塊吓,洞口亦開得好大,唔多 fit 面型,仲經常浮起要自己每隔一陣按一按,面型大的人會更合適。

敷完 30 mins 後,塊面膜紙都仲係好濕潤,雖然補濕效果算唔錯,但除此之外就冇其他效果睇到,未算有吹捧到咁驚喜,屬於可以一用但唔會 encore 嗰隻。

不過就好適合孕婦用,至少係冇化學物添加~


 Queen's Premium Mask 鑽石女王面膜 (每盒 5 片¥725 / 約 HKD 53) →

又係 hit 到 HK 都一早有售 (卓悅 $78),只係日本買會平廿蚊盒,聞說係同 SK-II 面膜同一間廠生產 (只係聞說,不過就算係同廠都不一定同料,大家懂的)~

賣點係採用日本白山底土水製成的厚身棉紙膜,多層結構伸縮性紙料能儲存大量精華,而每片 mask 亦蘊含 30ml 精華液,成份低敏,不含防腐劑 / 合成香料 / 紫外線吸收劑 / 礦物油等等。

最新出抗老 (紫盒) / 收毛孔 (黑盒) / 補濕 (紅盒) / 美白 (藍盒)


買咗美白版 (藍盒) →

成份具 70% 美白胎盤素、北海道溫泉水、EX 美白成分、維他命 C 等,集補濕 + 美白 + 提亮均勻膚色於一身。


用後感 →

面膜紙質較厚身,感覺比較實在,亦算 ok 貼面,只係鼻頭 / 唇邊 / 下巴位會間中浮起要按一按。有啲啲似 SK-II 隻 Facial Treatment Mask 的紙質但就更軟身貼面,面膜紙濕潤得來精華唔會滴出。

補濕效果唔錯,敷後亦見皮膚有光采、更潤澤,但美白同均勻膚色效果就唔算好强 (唔多覺有),以價錢計係算好 ok,純粹當佢補濕 mask 用係可以一試~


亦買咗緊緻毛孔版 (黑盒) →

成份具黑珍珠精華、膠原蛋白、透明質酸、維他命 C,沖繩海底泥、北海道溫泉水等,能解決乾燥、暗啞、細紋、毛孔粗大等問題。


用後感 →

面膜紙質同藍色美白嗰盒一樣屬厚款的,但就更加軟身貼面,內含滿滿精華液亦好好 feel,敷後感覺好補濕,膚色亦更均勻,但就唔覺得毛孔有特到收細到,而且洞口開得好大,有啲位置敷唔到,唇邊位會經常浮起移位。

但以價錢計都係 ok 嘅,我自己就 prefer 美白 (藍盒) 嗰款多啲~ 


肌美精「超浸透 3D 立體面膜」(每盒 4 片¥698 / 約 HKD 51) →

呢款又係人氣爆燈,HK 萬寧 / sasa 都有 ($68)

原先每盒 4 片,剛好遇上做緊優惠加送多 1 片,yeah~~

賣點係價錢平,仲係 3D 立體剪裁適合任何面型,長到連頸都敷到,每片 mask 蘊含 30ml 精華液,仲要係冇香料 / 鉛 / 水楊酸 / MIT / 螢光物質,不含刺激成份,性質溫和。

有分美白 (藍盒) / 深層滋潤 (黄盒) / 抗皺抗老 (粉紅盒) / 補濕減乾紋 (紅盒)


買咗美白款 →

蘊含高純度維他命 C、檸檬精華、膠原蛋白及蜂王漿精華,能抑制黑色素形成、提亮均勻膚色、去黃去暗啞,同時能重整肌膚水潤彈力,補濕美白一次過。


用後感 →

屬超大片! 連頸位都敷到,個 3D 立體剪裁都幾得意,亦算貼面,尤其眼底同鼻位確係敷到。但下巴位置就不停浮起移位,而且因為塊 mask 太濕有啲重,頸位亦會成日移位,除非係瞓低敷就冇事。

敷完 30 mins 見皮膚好濕潤,都 ok 嘅,但唔係首選,成日浮起移位有啲麻煩。


MINON Amino Moist 氨基酸保濕面膜 (每盒 4 片¥1200 / 約 HKD 88) →

呢款高人氣面膜 MINON,大家當然認得佢啦! 其實 HK sasa 都只賣 $83 左右 😊

賣點係針對敏感肌研製的專利防敏配方 + 蘊含健康肌膚不可缺少的 9 種氨基酸 + 低份子玻尿酸 + 保濕力高,特別適合敏感肌 / 乾燥肌用。


用後感 →

鍾意呢款面膜 size 比較細,唔會太大塊,fit 到我面型,而且紙質比較薄身,非常貼面,能緊貼皮膚不浮起或移位,敷完補濕度亦有明顯提升,有啲似「Dr.Wu 玻尿酸面膜」但就更補濕、更平更抵用~

雖然除咗補濕之外就冇其他特別效能,但整體都係好 good 嘅,值得購買~


KOSE「Clear Turn 豐盈面膜」(每包 40-50 片¥1180 / 約 HKD 87) →

又係 HK 有得賣 (約 $98),賣點係勁平! 每包有成 40-50 片 mask (視乎款式),而每片 mask 都有 6 合 1 至 8 合 1 功效,敷一片已等於用了爽膚水 + 精華 + 乳液 + 乳霜 + 眼膜 + 面膜等等 (有冇咁懶先 😂)

有分修護抗老 (金袋) / 補濕收毛孔 (藍袋) / 美白 (白袋) / 深層滋潤 (紅

全部都係刺激度低,不含香料


我揀咗金袋抗老版「超濃厚極緻修護面膜 EX」→ 

具 8 合 1 功效 (爽膚水 + 緊膚水 + 精華 + 乳液 + 面霜 + 舒緩 + 眼膜 + 面膜)

配合極滋潤成份如膠原蛋白、透明質酸、Lipidure®、Q10、摩洛哥油、天然保濕因子、甘油等,深層抗衰老修護,高補濕成份添加,深度滋潤滲透至角質層,改善乾燥細紋及收細毛孔,令細胞飽滿光澤,極緻修護。


一包 40 片,精華份量好充足 →


面膜屬中等厚度,都好大塊吓 →

選用 100% 日本製植物素材面膜紙,特別加厚 1.5 倍能載入更多精華液,不單能緊貼肌膚,更可令美容液更滲透至肌膚


用後感 →

真心講句係一啲都唔貼面,成日浮起兼移位,而且洞口開得極大,好多位置敷唔到!

另外雖然塊 mask 係有好多精華好濕潤,但係分子就比較大,感覺上似敷緊乳液多過精華液,唔覺得有吸收到好多精華入皮膚,敷完表面上係好潤澤,但洗完面就冇嘢睇,唔覺得有導入到落肌底層,不建議購買 👎🏻


KOSE「Clear Turn 深層修護緊緻眼膜」(每包 32 對¥880 / 約 HKD 65) →

呢款 HK 買仲平,只係 $59!

賣點當然係夠平,兼含有濃郁膠原蛋白、玻尿酸、天然保濕因子等多種滋潤成分,集中改善眼部乾燥、細紋、黑眼圈、眼袋及鬆弛下垂等問題,使眼部肌膚回復緊緻光滑,充滿彈力,而且不含礦物油 / 香料。


其實我一向都話唔使刻意買 eye mask (除非係特別好用啦),如果只求補濕效果,咁自己將爽膚水 / 精華水倒入化妝棉敷眼底都 ok,效果亦相差無幾。

但 KOSE Clear Turn 呢款咁平喎,真係連倒精華水落化妝棉呢步都慳返啦! 😆


每包 32 對都擺放得好整齊 →


紙質屬較薄身一類,都頗濕嫩 →

除咗敷眼底,仲可以用嚟敷虎紋


用後感 →

如比較起專櫃貴牌 eye mask,我會覺得呢款 KOSE Clear Turn 效果係差少少嘅,真係純粹補濕減吓乾紋仔、refresh 吓咁,唔會撫平到皺紋同改善到黑眼圈。

不過咁嘅價錢喎,單單得補濕效果都好抵用啦~ 值得買嘅 👍🏻


Hair Mask 髮膜 


Shiseido「The Hair Care Aqua Intensive Shield」頭髮護理 (每包 4 支¥498 / 約 HKD 36) →

比 HK 買平一半! 不過都見到有網店只售 $49,有冇貨就唔知了。

賣點係獨創 "模仿水份技術",針對髮絲乾旱根本成因發揮功效,由內而外深層補濕鎖水,同時修復受損髮絲,令髮絲回復水潤亮澤,係適合乾旱 / 電染受損髮質用的日本專業級 home care treatment。


用後感 →

係好明顯有好轉的! 吹頭時 feel 到頭髮更柔順、更易梳理,價錢又平,值得購買 👍🏻

不過大家知我把頭髮長期漂染,受損枯乾程度係沙漠級,近來就連用我力薦嘅「Wella Liquid Hair SP (頭髮神仙水)」同「Moroccanoil 摩洛哥髮尾油」都就快攪唔掂,所以用呢支 Shiseido 雖然係有改善,但未至於好强效,係有用勝於唔用。而髮絲受損程度冇我咁勁的人用,係應該會好有幫助~

使用方法 : 每星期 1 次。洗髮 → 落護髮素或 hair mask → 無需清洗直接用呢支 Shield → 按摩幾分鐘後清洗 (不適合用於頭皮,只搽頭髮中至尾段)


Shiseido「fino 高效滲透護髮膜」hair mask (¥698 / 約 HKD 52) →

又係 HK 都有 (sasa $55)

賣點係針對受損髮質而設,含 7 種精華成份如蜂王乳精華、海藻糖、PCA 毛髮緊緻成份、修護保濕因子等,能從髮根深入滲透到髮梢,用後髮質變得更順滑、有光澤、具彈性。

我覺得佢係潤到不得了,係潤到有啲黏膩,但洗完頭吹乾摸上手又唔覺特別柔滑喎。所以雖然人人都讚佢,但我認為佢只屬一般。

使用方法 : 洗髮 → 護髮素 → 用呢盒髮膜按摩 → 帶上浴帽或包毛巾敷 5 mins → 清洗 (不適合用於頭皮,只搽頭髮中至尾段)


其他必買小物


LION 獅王兒童漱口水 / 牙膏 (¥398 / 約 HKD 30) →

日本出名多款過 hk 好多! 特別係兒童漱口水,冇成人漱口水咁 strong 咁薄荷,零刺激味道,小朋友會從此愛上刷牙 / 漱口~ 

有小朋友的話係必買,也可買俾有 kids 的朋友們做手信 👏🏻


3M「SCOTCHGARD Protector」 速效防水層噴霧 (¥498 / 約 HKD 37) →

噴上 1 分鐘就乾透,形成持久防水層,落雨時可保護你的貴價皮鞋 / 皮靴 / 波鞋 / 涼鞋 / 手袋等等,冇咁易俾污水整污漕或留下水跡。

有時見到啲皮鞋 / 手袋沾到水跡油跡,污污漕漕咁都好心痛嘛!


ARAX「PITTA Mask」立體口罩 (每包 3 個獨立包裝¥498 / 約 HKD 37) →

呢個唔使多講啦,中港台日韓熱賣,各大明星避狗仔隊必用! 🤣

除咗有型有款之外,最重要係舒服! 唔會貼實口鼻透唔到氣 / 侷到痕 / 整花個妝 / 箍到耳痛! 

物料係由聚氨酯製成,軟泡綿觸感彈性高,輕身又通氣,獨特的三維立體結構密實性高,可阻擋微塵 / 感冒菌 /  99% 花粉,每個仲可清洗 3 次重複使用而不影響過濾效能,正到冇朋友~ 

日本成人版有黑 / 灰 / 白色,仲有小童版,多款過 hk (見到 HKTVmall 賣 $45)


小林製藥「加濕立體口罩」(每盒 3 個¥398 / 約 HKD 30) →

呢個我認為係必買,要掃貨! 👍🏻

除咗係高密度過濾質料,可阻斷空氣中的病毒飛沫 + 阻隔 99% 花粉外,賣點係有多一塊 "加濕片",能透過人體呼吸轉化為蒸氣,濕潤鼻腔及喉嚨,舒緩乾燥不適感的加濕型口罩。 

有分冇味 / 柚子味,仲有分日用版 / 夜用版


痛嘅時候嗰種又乾又辛苦、透唔到氣嘅感覺大家明,用加濕型口罩確係會舒服好多嘅~


LION 獅王「休足時間」舒適清涼小腿足貼 (每盒 18 片 ¥448 / 約 HKD 33) →

雖然 HK 都有 (Watson's $55),但日本買會平廿蚊~

我响日本行到攰、小腿腫漲痛到想死時貼咗一晚,清涼又薄荷,即刻舒服晒! 👍🏻

可貼於小腿腳肚、腳底等需要舒緩的酸脹部位,水凝膠中的水分遇熱會汽化,與清涼成份薄荷醇同步發揮效力,滲透清涼效果,幫助小腿 / 腳底放鬆舒緩,減輕繃緊不適,成份溫和不刺激,長時間敷貼亦不易引發皮膚炎症。


採用特製高含水凝膠 →

老實講唔算話貼得超實淨,不過都算 ok 的,有時反瞓翌朝起身都係會見到甩咗 (唔係次次會甩),不過效果確係幾好~


Earth 製藥「黑帽子高效曱由屋」蟑螂藥  (每盒 12 個 ¥598 / 約 HKD 44) →

人人都話好有效,去日本一定要買咁講。Touch wood 屋企未見過有大曱甴,只係有曱甴仔,不過應該仲冬眠緊未開始出動,夏天試完再報告俾大家知~

藥劑形狀經過特殊設計,讓蟑螂很易就食到而迅速死亡,連鎖效應的從根本上解決蟑螂問題,對蟑螂卵及懷卵雌蟑螂均有效。三面開口黑色設計,放在暗處不易使蟑螂察覺,360° 引誘蟑螂。藥物放在小帽子內,不怕擔心幼童 / 寵物會食到。 


日本藥品


龍角散我就唔介紹喇,人人都食過啦~

不過我每次喉嚨痛食佢,都對我完全起唔到作用,所以對佢冇乜好感。


小林製藥「KOBAYASHI 喉嚨痛噴劑」(¥698 / 約 HKD 52) →

呢隻對我來講 work 好多! HK 亦有售 (Watson's $59.9),但日本有埋 "小童士多啤梨味版"~

賣點係有特長噴咀,能深入喉痛患處殺菌消毒,對喉嚨不適 / 喉嚨發炎有效,有輕微的薄荷清涼感覺,攜帶方便。

使用方法: 每日 3-5 次﹐噴適量藥液於患處,藥液可吞服。對碘有過敏症 / 甲狀腺病患者 / 2 歲以下幼兒 / 孕婦及哺乳期婦女不可使用。(香港醫藥品註冊編號: HK-41633)



唔鐘意用噴霧的話,日本亦有售膠囊藥丸版,主治喉嚨發炎 →


另外「大正製藥」的感冒藥 

大正製藥的「感冒藥粉 (微粒)」亦有勁多人熱捧,好多人都話 work (包括我另一半),不過我試過就冇乜效,而且 HK 亦曾有報導指日本成藥「成份強效啲,引致嘅副作用會增加,有機會增加血壓,心律不正及高血壓人士需小心使用」,所以最好問清楚先買。

我一向唔鐘意藥粉 (微粒) 形式,所以係食開同一系列嘅藥丸→

左邊 : 專治喉嚨痛、收鼻水、通鼻塞
右邊 : 綜合感冒藥

我食過呢 2 款都係好 work 的,通常食 2 次已見效! 不過成藥呢啲都係只治到初起病徵痛症,有病最好去睇醫生啦~


BES「230 種生酵素」(一個月份量 ¥3500 / 約 HKD 260) →

銷售排行連續 43 個月 No.1,平時少食生果蔬菜的話真係點都要試試,仲可以排毒瘦身咁話!

成份含多達 230 種蔬菜水果提取的活性酵素 + 5 種超級食物,包括巴西莓、枸杞、馬奇果、火龍果、麻籽等,能為身體補充每日所需營養,促進新陳代謝和腸胃健康,幫助排毒清宿便,改善皮膚質素,美顏瘦身,改善體質。

有分沖劑 / 藥丸版,我係買咗藥丸版,暫時只係食咗 2 日,未覺得有咩反應住,試耐少少再 share 俾大家知~


玩具???


49K Roll Piano 捲摺式電子琴 (¥3980 / 約 HKD 296) →

呢個同樣喺驚安店購入,當然係買俾一對小朋友玩啦~

夠晒慳位又夠抵,正正正正正~~~~~ 😍


個人認為 $296 經已唔貴,點知買完之後,响另一間電器舖見到有個只係 under $200!! (但唔同牌子) 不過買咗就算啦,唯有安慰自己呢個音質會好啲 🤣


唔玩可以捲起收藏,真係好適合 hk 咁狹窄嘅居住環境!


2 則留言:

  1. Hi Isa, 之前好鍾意用girlactik florence, 有冇其他牌子有近似色推介?

    回覆刪除
    回覆
    1. MAC 隻 #MELBA 胭脂粉同 florence 係最似~

      刪除